مرکزی جلوس کی مانیٹرنگ کے لیے 200 کیمرے فعال، کنٹرول روم صوبائی ہیڈ کوارٹر سے منسلک

​ضلعی انتظامیہ لاہور امن و امان کے قیام کے لیے تمام وسائل بروئے کار لا رہی ہے، کیپٹن (ر) محمد علی اعجاز

​سوشل میڈیا اور الیکٹرانک میڈیا کی کڑی نگرانی، تمام متعلقہ محکموں کے نمائندے ہائی الرٹ، ڈی سی لاہور 

ڈپٹی کمشنر لاہور کیپٹن (ر) محمد علی اعجاز نے یومِ علیؓ کے موقع پر شہر بھر میں سیکیورٹی اور دیگر انتظامات کو یقینی بنانے کے لیے ڈی سی آفس میں قائم مرکزی ضلعی کنٹرول روم کا تفصیلی دورہ کیا، جہاں انہوں نے مانیٹرنگ کے عمل کا خود جائزہ لیا۔ اس موقع پر ایڈیشنل ڈپٹی کمشنر ہیڈ کوارٹرز ذوالقرنین خان اور انچارج کنٹرول روم سید علی مرتضیٰ بھی ان کے ہمراہ تھے۔ دورے کے دوران ڈی سی لاہور کو بریفنگ دی گئی کہ مرکزی ضلعی کنٹرول روم براہِ راست محکمہ داخلہ میں قائم مرکزی صوبائی کنٹرول روم سے منسلک ہے، جہاں سے شہر کے مختلف حصوں بالخصوص مرکزی جلوس کی نگرانی 200 جدید سی سی ٹی وی کیمروں کے ذریعے کی جا رہی ہے۔ ڈپٹی کمشنر لاہور کیپٹن (ر) محمد علی اعجاز نے ہدایت جاری کی کہ جلوس کے روٹ کی لمحہ بہ لمحہ مانیٹرنگ جاری رکھی جائے اور تمام کیمروں کو ہر صورت فعال رکھا جائے۔ انہوں نے کنٹرول روم میں تعینات تمام محکموں کے نمائندوں کو الرٹ رہنے کا حکم دیتے ہوئے کہا کہ سوشل میڈیا اور الیکٹرانک میڈیا کی مانیٹرنگ کو بھی ہر صورت یقینی بنایا جائے تاکہ کسی بھی قسم کی افواہ سازی کا سدباب ہو سکے۔ ڈی سی لاہور نے واضح کیا کہ یومِ علیؓ کے موقع پر امن و امان برقرار رکھنے اور شہریوں کے تحفظ کے لیے ضلعی انتظامیہ لاہور تمام دستیاب وسائل بروئے کار لا رہی ہے اور کسی بھی ناخوشگوار واقعے سے نمٹنے کے لیے ہمہ وقت تیار ہے۔ انہوں نے مزید کہا کہ کنٹرول روم میں تمام متعلقہ محکموں کی موجودگی بہترین کوآرڈینیشن کی ضامن ہے اور اب تک کے انتظامات مکمل طور پر تسلی بخش ہیں، انشاء اللہ جلوس اپنے مقررہ وقت پر پرامن طور پر اختتام پذیر ہوگا۔ مانیٹرنگ کا یہ عمل جلوس کے باقاعدہ اختتام تک بلا تعطل جاری رہے گا۔