سیرتِ نبوی ﷺ کا بنیادی پیغام خدمت خلق ہے:ڈاکٹر ابوبکر صدیقی

اسلام آباد 11 مارچ()علامہ اقبال اوپن یونیورسٹی میں ہفتہ وار سیرت لیکچر سیریز کے تیسرے سیشن میں سیرتِ طیبہ کے اہم پہلو“خدمتِ خلق”پر روشنی ڈالی گئی۔ اس سیشن میں لیکچر دیتے ہوئے ڈاکٹر محمد ابو بکر صدیق نے کہا کہ حضور اکرم ﷺ کی پوری حیاتِ مبارکہ انسانیت کی خدمت، ہمدردی اور خیرخواہی کا عملی نمونہ ہے۔ڈاکٹر ابو بکر صدیق نے بتایا کہ حضور ﷺ نے اپنی تعلیمات اور عملی زندگی کے ذریعے واضح کیا کہ انسانیت کی خدمت دینِ اسلام کا بنیادی تقاضا ہے۔ آپ ﷺ نے نہ صرف مسلمانوں بلکہ تمام انسانوں کے ساتھ حسنِ سلوک، عدل اور رحمت کا برتاؤ فرمایا۔ یتیموں، مسکینوں، بیواؤں اور ضرورت مندوں کی مدد آپ ﷺ کی زندگی کا اہم حصہ تھی اور معاشرے کے کمزور طبقات کی دلجوئی اور مدد کو اپنی ذمہ داری سمجھا جاتا تھا۔ڈاکٹر صدیق نے کہا کہ خدمتِ خلق دین کا بنیادی حکم ہے اور اصل میں دین کا مطلب ہی خیرخواہی اور انسانیت کی بھلائی ہے۔انہوں نے زور دیا کہ کسی ضرورت مند کی مدد کرنا نہ صرف آخرت میں عظیم ذخیرہ ہے بلکہ یہ اللہ کی رضا حاصل کرنے کا سب سے بہترین ذریعہ ہے۔ چاہے نیکی تھوڑی ہو یا زیادہ، مالی تنگ دستی ہو یا مالی استحکام ہر صورت میں خدمتِ خلق لازمی ہے۔ڈاکٹر ابو بکر صدیق نے کہا کہ آج کے دور میں ضرورت اس بات کی ہے کہ ہم حضور اکرم ﷺ کی تعلیمات کی روشنی میں خدمتِ خلق کے جذبے کو زندگی کا حصہ بنائیں اور انسانیت کی فلاح و بہبود کے لیے عملی کردار ادا کریں۔افتتاحی کلمات ادا کرتے ہوئے ہیڈ آف لائبریری، سید غلام کاظم علی نے کہا کہ ہفتہ وار سیرت سیشنز یونیورسٹی کی مرکزی لائبریری اور کلیہ عربی و علومِ اسلامیہ کے اشتراک سے منعقد کیے جا رہے ہیں، جہاں علمی ماحول میں سیرتِ نبوی ﷺ کے مختلف پہلوؤں پر گفتگو کی جاتی ہے۔ ان کا کہنا تھا کہ ان نشستوں کا مقصد طلبہ اور یونیورسٹی ملازمین میں سیرتِ طیبہ کے مطالعے کا شوق پیدا کرنا اور حضور اکرم ﷺ کی تعلیمات کو عملی زندگی میں اپنانے کی ترغیب دینا ہے۔

(ڈائریکٹوریٹ آف پبلک ریلیشنز)